حكاية يوميات طالبة جامعية....منقول.....

شاطر | 
 

 حكاية يوميات طالبة جامعية....منقول.....

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
همسة براءة



نوع المتصفح موزيلا

صلي على النبي

صل الله عليه وسلم


انجازاتي
لايتوفر على اوسمة بعد:

الوسام الأول


مُساهمةموضوع: حكاية يوميات طالبة جامعية....منقول.....   2011-09-17, 21:47

حكاية يوميات طالبة جامعية....منقول.....


السلام عليكم إخواني اخواتي
الإسم: فتاة جزائرية
اللقب: ملتزمة دينيا
التخصص: قارية بيولوجيا
الأصدقاء: كامل الناس
الشخصية: غريبة الأطوار لكن طيبة
هذي بعض مواصفاتي العادية وإليكم يومياتي الغير عادية أرجو ان تنال إعجابكم

قبل الجامعة كنت وحدة طايشة كل حاجة عندي نقضيها غدوة حتى الباك كنت باغية
نجيبو برك باش نفرح بابا وأما وكي يقولولي واش راكي باغية تخرجي في
المستقبل نقولهم خلو المستقبل للمستقبل
نهار لي جبت الباك فرحت بزاف وبيناتنا والله حتى بكيت راكم عارفين فرحة الباك ماتتنساش تكون بزاااااااااااف حلوة
بصح من بعد ياخواتي بدا التعب تع الصح كنت دايما نقول كون غير نجيب الباك
ونريح نهار لي جبت الباك لقيت روحي هذا وين بدا التعب الحقيقي خرجي ورق حطي
ورق ادفعي ورق و bien sur راكم تعرفوا الإدارات تاوعنا
واكثر حاجة تعبتني هي إختيار الشعبة لي باغية نقراها سقسيت كامل الغاشي لي
قاريين ولي ماشي قاريين خاطر ماكنتش دايرة حتى هدف ولا مشروع في راسي وكل
واحد بدا يرايي على حساب فهامتو لي يقلي ديري طبيبة باش تداويني باطل ولي
يقلي ديري شيخة راهم يخلصو مليح وانا في تالي درت غير رايي انا خيرت واش
خيرت ودفعت هذيك الورقة وقعدت نستنى انا وزهري.
كي خرجت résultat عطاولي بيولوجيا انا قريب مت من الخلعة surtout كي قالولي القرايا كامل بال français وانا كنت نص نص فيها
المهم رضيت بالأمر الواقع و رحت باش نسجل في هذيك البيولوجيا على سعدي وراح
معايا بابا خاطر مانعرفش مليح الجامعة وهذوك البروتوكولات تع التسجيلات
خاطيني كي دخلت من الباب تع الجامعة مانيش عارفة وعلاه جا في بالي هذا
الدعاء ( يارب ادخلني مدخل صدق واخرجني مخرج صدق)
رحنا لوين يسجلوا وتماك بابا قرا بلي عطاولي شعبة العلوم الزراعية
والبيولوجية راسو حبس وحسب درت تخصص زراعة وقعد في نص الحرم الجامعي يزقي
عليا ويقلي وعلاه درتي زراعة وانتي واش راح تديري بيها انا قلتيلي بيولوجي
ماشي زراعة لوكان كامل ما جيتش معاك حكمتو على جيهة وبديت نفهم فيه
بالعقل بلي هذي الكلية لي رح نقرا فيها تتكون من زوج شعب وحدة تع العلوم
الزراعية والثانية تع البيولوجيا وفي الأخير كامل اقتنع و قالي روحي سجلي
راهم قريب يغلقوا ويروحو يفطرو
وسجلنا في الجامعة والحمد لله فريناها على خير

كي دخلت للجامعة صراولي بزااااف حوايج بصح ماشي اليوم رح نقلكم عليهم نخلوهم لغدوة ان شاء الله
ايلا اعجبتكم يومياتي قولولي باش نكملهالكم وايلا لالا تان قولولي باش نكملهالكم
يالله اترككم في رعاية الله وصلوا على رسول الله صلى الله عليه وسلم


لألألألألألألألألألألألأل ألألألألألألألألألألألألأ لألألألألألألألألألألألأل ألألألألألألألألألألألألأ لألألألألألألأ
لألألألألألألألألألألألأل ألألألألألألألألألألألألأ لألألألألألألألألألألألأل ألألألألألألألألألألألألأ لألألألألألألأل

:pat ch_ordi:

.السلام عليكم

غدا الدخول الجامعي مازلت كيما الذراري الصغار نبغي النهار اللول تع القرايا حددت و وجدت كسوتي لي رح نلبسها غدوة
الليلة جداتي راهي بايتة عندنا يسمى ماكالاه n'rigule reveil باش نوض بكري هي أكيد رح تتكفل بالأمر

جداتي كانت مقلقة وقتاش نروح نقرى في الجامعة اكثر مني غير دقت 6.30 لقيتها
عند راسي واختكم بالسيف باش رقدت ليل كامل وانا نخمم كيفاش رح تكون
القراية كيفاش رح يكونو لي بروف ولوكان ماشي ريحة القهوة والمغيز اللي
شميتهم يطيبو ماشكيتش نوض من بلاصتي .

المهم نضت توضيت وصليت واتهجت فورا للكوزينة لقيت ماما متكفلة بالحالة من
بعد ماشربت قهوتي رحت لبست وستيكيت روحي كيما يلزم راني جامعية ضروك لازم
نتهلى في العميرة
وبيناتنا لايمت شوية دراهم من الناس لي زعما بوركولي بيهم على الباك و
شريتهم كامل لبسة وحاشاكم سبابط وخيرت باش ندخل أول يوم بلبسة كامل بيضة
قلت انا تكون فال خير عليا

جدة غير شافتني قالتلي والله تقول طبيبة زعما باش تطلعلي المورال ولا مانعرف (هي اصلا لازم تعلق)

بصح كي خرجت من الدار شفت بلي بزاف ناس يبغو يعلقو لي يقول إنا لله وإنا اليه راجعون ولي يقول تقول fraijidair ولي يقول machine a lavi وعند الدخلة تع الجامعة لقيتلك زوج من فلسطين الشقيقة عرفتهم من لهجتهم ونظن حتى ناس الشرق الأوسط يبغو التعليق قالك ( تقول ملاك ونازل من السما) اووووف فرق كبير بين فريجيدار وملاك

دخلت département تاعنا وتماك لقيت بزاف بنات كنت نعرفهم في الليسي الغاشي
كامل دارو بيولوجي امالة ماعندي مانخاف قلك إذا عمت خفت ولي فرحت بزاف كي
تلاقيتها هي صحبتي وبنت جيرانا فتيحة لقيتها تم تقول عليها عندها عشر سنين
وهي تقرا في الجامعة زعما توري للغاشي وين جاي l'amphi لي نقراو فيه
وكامل وحتى هي وماسكلتش من تعليقها غير شافتني بدات تقولي حمامتي بيضة
!!!!.


بدات الساعة اللولة دخلنا للمدرج وحكمنا انا وفتيحة البلاصة اللولة مازلنا
حاكمين السيستام تع الليسي قلت انا هاكة باش الشيوخا يولو يعرفوني ويعقلو
عليا مين يشوفوني دايما قاعدة في وجوههم وغير دخل الشيخ سكتو كامل
التلاميذ اه قصدي الطلاب وبدا هذاك الprof يقدم في روحو وفي الموديل تاعو
واحكم انت لي تحكم مافهمت من هدرتو غير je m'appel ساسي de عنابة والباقي
قلت كي نخرج نسقسي فتيحة بالاك تكون قبضت خير مني المهم من بعد ماحكا
كاااااااامل واش حكا قالنا ايا السلام عليكم الدروس يبداو نهار الثلاثاء
إن شاء الله هذي bien sur فهمتها خاطر قالها بالعربية


كان هذا هو الشيخ الوحيد لي جا اليوم استنينا شوية وكي ما جا حتى واحد لينا
خرجنا انا وفتيحة وبدينا نكتشفو في الأجواء ماكنت عارفة حتى حاجة تم لي
نشوفها تخلعني مرة على مرة نلقاو وحدة كنا نعرفوها من الليسي فوتنا نهارنا
تم وكلي ماكنتش باغية نرجع للدار من كثر لي عجبتني الحالة

كي رجعت للدار لقيت جدة واما يستناو فيا باش نحكيلهم واش درت وانا بلا
ماتوصو حكيت على كلش وبالتفصيل بالطبع ماعدا التعليقات لي سمعتها في الطريق


هكة فات اليوم اللول ومزال الباقي استناوه في الأيام القليلة الجاية إن شاء الله
ايا السلام عليكم وصلى اللهم وسلم على سيدنا محمد
[/size]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
همسة براءة



نوع المتصفح موزيلا

صلي على النبي

صل الله عليه وسلم


انجازاتي
لايتوفر على اوسمة بعد:

الوسام الأول


مُساهمةموضوع: رد: حكاية يوميات طالبة جامعية....منقول.....   2011-09-17, 21:47

.السلام عليكم ورحمة الله


بعد ما فوتنا الأسبوع اللول و القرايا نص نص مزال مابديناش مليح les prof
راهم غير يترينيو وانا عجبتني هكة الحالة نروح نجمع ونقرعج ونرجع خاصة بعد
ما زدت تعرفت على زوج بنات لطيفة وفاطيمة كنت نعرفهم من يامات الليسي بصح
ماكناش مداسرين بعضانا مليح حتى للجامعة لطيفة تظل تضحك وحاجة ماتسكتها
وفاطيمة قافزة بزاااااف وفتيحة كيما قلتلكم تلعبها تعرف كلش غير باش يقولو
عليها فاهمة بصح كامل بنات ملاح ويدخلو في القلب.



جاء الأسبوع الثاني والقرايا بدات تتزير الشيوخا مدولنا le programme وبزاف
لي بداو يقرونا بصح انا مازلت ضايعة مع الفرنسي نقعد coure كامل وانا نهز
في راسي تقول عليا فاهمة كلش وانا لوكان يقلي برك عاوديلي شاقلت يحبس
قلبي.





اليوم خرجنا على 12 وحكمنا الجوع وقالك ياسيدي راكم مسجلين في المطعم الجامعي الريسطو تقدرو تاكلوا باااااطل
عجبتني العفسة هذي تع باطل قلت للبنات ايا نروحو نشوفو كيفاش الحالة وكي
لحقنا لتم قالك لازم تشرو تيكي بسعر رمزي باش تقدرو تفطرو اشرينا التيكيات
مدام السعر رمزي ماخسرنا والو وفي الدخلة تع risto لقينا لاشان
طويييييييلة قعدنا ساعتين واقفين ومن بعد لي كنت جيعانة شبعت وفي الأخير
كي وصلنا لقيناهم دايرين حاجة تشبه للوبيا وشوية ورق تع سلاطة بلا la sos
ولي سوفاتني وماخلاتنيش نبكي هي التمر لي حطولنا منو وقواولنا انا رفدت
التمر وخرجت خاطر كانت الواحدة والكوغ يبدا على الواحدة رحنا نجرو
ولقيناهم دخلو والشيخة هذيك حنونة بزاااااف طلينا عليها غير من الباب ضحكت
وهزت راسها كلي قالتلنا ادخلو احنا فرحنا ودخلنا نجرو بصح غير دخلنا
وشافونا كامل les étudiants قالتلنا برا شكون قالكم ادخلو جيتو روطار وانا
غير ندخل مانقبل حتى واحد يدخل مورايا.




خرجنا وقعدنا في بلاصة شابة فيها الحشيش والظل وحطينا التمر لي جبناه معانا وكلينا كلي ماصرا والوووو.




خلاص هذا اليوم بصح حكايتي مع الريسطو ماخلاصتش رحنا في اليوم الثاني على
11 وكنا شاريين التيكيات وسمعنا بلي راهم دايرين الجاج محمر يسمى حاكمة
قلنا رحمة ربي احنا البارح ماكلينا والو اليوم نخلفوها كي وصلنا لقينا
جماهير عريضة تقولي حفلة رح يحييها تامر حسني تسللت شوية للوسط قلت هكة باش
مانكونش الأخيرة بصح اكتشفت بلي لصقت وسط زوج بنات من نيجيريا وحدة قدامي
والثانية مورايا وكل وحدة دايرة كي الحيط انقطع فيا التنفس بغيت نرجع ونخرج مالقيتش كيفاش واخواتنا ناس نيجيريا مزال ماتعلموش هدرتنا قلتلهم مانيش قادرة نتنفس مافهمونيش قلت احسن حل نطلع راسي باش نتنفس مليح بديت نحوس على فاطيمة لقيتها رايحة من جيهة المعوقين وداية plat تع الجاج قلتلكم ساجية اما لطيفة كي لقاتها حامضة عليها سلت روحها وراحت مادارتش اصلا لاشان وفتيحة برك لي بقات معايا مسكينة تبغيني.



بعد ما ازرقت واخضرت واحمرت وصلت اخيرا للتاقة لي يمدولنا منها الأكسجين اه
قصدي الماكلة بصح اختكم كانت خالصة ومخلصة قلت الهربة تسلك حطيت plat
وخرجت بين الموت والحياة لحقتني فتيحة على شعرة كنت رح نطيح ورجعتني للدار
وانا طريق كاملة وانا نحلف بلي هذا آخر يوم نروح لحاجة اسمها الريسطو.



اللهم صلي وسلم على سيدنا محمد
[/size]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
همسة براءة



نوع المتصفح موزيلا

صلي على النبي

صل الله عليه وسلم


انجازاتي
لايتوفر على اوسمة بعد:

الوسام الأول


مُساهمةموضوع: رد: حكاية يوميات طالبة جامعية....منقول.....   2011-09-17, 21:48

.السلام عليكم



وصلت للدار ميتة بالعيا وقلبي يدور وراسي يوجع طحت في بلاصتي وماقدرتش نوض
منها وحتى الظهر نضت بالسيف صليتو ماما مسكينة راحت بلخف وقبل ماتحوس تفهم
غلاتلي نعناع وجابتولي والحمد لله غير شربتو ريحت ورقدت حتى للمغرب نوضني
برك صوت التلفون فيكس يصوني كي رفدت لقيتها فتيحة تعيطلي باش تسقسي عليا
ايلا بريت
. قلتلكم تبغيني .



وفي الليل درت سهرة طويلة مع العايلة حكيتلهم واش صرالي اليوم و bien sur
ماقلتلهمش بلي فاطيمة قفزت وفاتت من جيهة المعوقين ودات فطورها بلا ماتدير
لاشان خاطر على بالي بابا يديرلي محاضرة على لبنات الساجيات ولي يعرفو
يعيشو. mais هو كي حكيتلو غضتو قالي هذي المرة نعطيك تاكلي برا فرحت بزاف
وقعدت نستنى وقتاش يلحق الشهر الجديد باش تلحقني الزيادة في المصروف.



بعد السهرة الطويلة ماقدرتش نوض بكري الصباح ولحقت للجامعة روطار قعدت برا
ندور حتى خلاص الcoure اللول خرجوا لبنات فتيحة ولطيفة ماعدا فاطيمة طبعا
هذيك تجي على ال 11 وتخرج على 3 وكي نقولولها تقلنا مانقدرش نوض بكري هذي
هي القرايا في الجامعة انا بيناتنا ماكنتش نبغي نعطل الدروس ماشي خاطر
قرَايا بصح نكره نتسلف cahier ونعاود نكتب في الدار.



البروف تع الكيمياء مدلنا بحث عن الهيدروكربونات وكنا احنا اربعة فيه
بانتلي حاجة صعيبة بزاااااف وماعرفتش كامل كيفاش نسلك من هذي الورطة ربي
يجيب الخير برك. قررنا نروحو للمكتبة لأول مرة ونشوفو كيفاش تمشي الحالة كي
دخلنا لقينا وحد تم تقدمت انا وسقسيتو ايلا يقدر يمدلنا كتاب تع الكيمياء
العضوية قالي كيفاش يسموك وكي قلتلو لقى روحو يعرف خويا راح بلخف جابلي
كتاب وجا وقالنا ادخلو للمكتبة الداخل واقراو فيه ومن بعد...
وقبل مايكمل هدرتو رحنا احنا للمكتبة

انا ديت الكتاب ورحت انا ولبنات لداخل المكتبة وبدينا نقلبو في الصفحات
واحنا مانا فاهمين والو وفوتنا قريب ساعة واحنا نضحكو على روحنا كي لحقت
الوحدة رحنا باش ندخلو للكوغ درت الكتاب في الساك ورحت كي بديت خارجة قدام
هذاك لي مدلي الكتاب شفتو بدا يخزر فيا ويتبع فيا بعينيه بديت نقول في
قلبي هذا مالو مايحشمش كيفاش يخزر فيا هاكة هذي لي زعما يعرف خويا. ماديتهاش فيه وفت عليه بلا مانخزر ليه

البروف تع الفيزياء ماجاش فرحت بزااااف خاطر كنت عيانة ومديقوتيا من روحي كي مافهمت والو في البحث.


كي رحت للدار جبدت الكتاب وبديت نقرا فيه وحدي وجبدت هذاك dictionnair
scientifiq وسييت نعاون بيه روحي وبالفعل والله فهمت بزاف دروس كنت حابسة
فيهم ولقيت مقدمة وبعض المفاهيم للبحث تاعي وعيطت لفتيحة تزيد تحوس في
الانترنت خاطر هي عندهم في الدار. وفي اليوم التالي جابتلنا فتيحة تقريبا
البحث واجد بصح انا أصريت باش نحط المقدمة تاعي والمفاهيم لي لقيتها في
الكتاب وكتبنا البحث وحطيناه في الموعد وانا استفدت بزاف من الكتاب bien
sur بعد ماقعد عندي اسبوعين كاملين قلت نرجعو لمولاه يمكن يستحقو؟؟؟ وغير
شافني قالي ارواحي هنا ارواحي عندي سمانتين وانا نحوس عليك وين كنتي انا بانتلي كلي راه حاب يداسر قلتلو: واش بيني وبينك حتى تحوس عليا


قالي: ماكان والو غير الخير برك راكي داية كتاب تع الجامعة وناسياتو عندك
وهذاك الكتاب المفروض كامل مايخرجش تقراي بيه داخل المكتبة وترجعيه
[/size]. قبل ماتخرجي خاطر كاين منو نسخة وحدة برك تماك فهمت وعلااه كان يخزر فيا هذاك اليوم
وحتى للعام الثاني كي راح هو من المكتبة وجا واحد أخر باش عرفت بلي ممنوع
يمدو الكتب بلا la carte وتماك وين عرفت صح بلي صاحب خويا وناس ملاح

وصلى اللهم وسلم على سيدنا محمد
[/size]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
همسة براءة



نوع المتصفح موزيلا

صلي على النبي

صل الله عليه وسلم


انجازاتي
لايتوفر على اوسمة بعد:

الوسام الأول


مُساهمةموضوع: رد: حكاية يوميات طالبة جامعية....منقول.....   2011-09-17, 21:48

.السلام عليكم[/size]

. جاء اول الشهر وبابا كان عند الوعد تاعو و زادلي في المصروف الشهري فرحت بزاااف بهذيك الزيادة الصباح نضت بكري وطيبت القهوة وشربتها مع ابي (نقلو ابي برك كي نبغي نطلب منو حاجة ولا نكون فرحانة) وماما.[/size]

. أما اختي فكان يلزملها خمس جولات حربية باش تنوض من الرقاد ودايما نخلي ماما معاها في الجولة الثالثة ونروح للجامعة الحمد لله الثانوية نتاعها ماشي بعيدة بزاف على الدار.[/size]

.
في station تلاقيت بوحدة تقرى معايا نعرفها غير من بعيد لبعيد اسمها نجاة
كانت ملتزمة وجامي شفتها تضحك او tsirculer مع لبنات كنت نشوفها يا إما في
المدرج او في المكتبة وكل ما نتلاقى بيها نقلها السلاااام عليكم ورحمة
الله وبركاته.
[/size]

.
اليوم ركبت معاها في transport وقلت هذه فرصة بما اني زادولي في الشهرية
نخلص عليها ال buss والله تستاهل هي فرحت بزاااف وقالتلي بارك الله فيكِ
اختي في الله، عجبتني بزاااف هذي اختي في الله ومن بعد قالتلي يالله ننزلوا
في l'arét اللولة ونركبوا قي النقل الجامعي راه يفوت منا وانا نستناه
دايما ونروح فيه حتى للجامعة.
[/size]

.
بغيت نروح بصح كي تفكرت واش صرالي مع الريسطو قلت jamais وبيناتنا غروني
دراهمي في جيبي قلتلها لالا اسمحيلي انا نروح كيما موالفة من transport ل
trannsport حتى نوصل وزيد اليوم ماعنديش coure بكري معليش نوصل rotard.
[/size]

.
كي وصلت لقيت فتيحة لتم هي دايما توصل بكري وقبلنا كامل خاطر باباها
يوصلها بالطوموبيل وقعدت معاها شوية وصلت لطيفة وفي الاخير كامل كالعادة
وصلت فاطيمة وبعد ماقرينا حتى لل 12.30 خرجنا ميتين بالجوع وانا زعمة بغيت
نتكرم وقلتلهم اليوم نروحوا نفطروا برا والحساب عليا انا .
[/size]
.
دخلنا لل pizzeria تع عمي صادق قالك يصنع بيتزا تهبل دمونديت 1 pizza و 4
soufli و4 قازوز كلينا حتى شبعنا وما درنا لا لاشان لا والو.
[/size]

. كي جيت خارجة قلتلو شحال نخلصك؟؟ قالي 500 دج وليت نعرق بصح كلي مابغيتش نبين قلتلو برك!!! وخلصتو وخرجت وطريق كاملة وانا نخمم كيفاش رح نكمل باقي الشهر (اواااااه بابا كلخلي والمصروف اللي عطالي مايكملش حتى اسبوع) وهذا كامل وانا نضحك مع لبنات باش مايحسوش بلي خلصت عليهم وندمت.[/size]

.
ثاني يوم كي ركبت في ال bus تلاقيت تان مع نجاة راكبة طلبت مني مرة اخرى
باش نروحو في النقل الجامعي وبما انو حسيت بالخطر على المصروف الشهري
قلتلها معليش ياسيدي نروحو ، نزلنا في l'arét اللولة وبقينا نستناو حتى فات
علينا الbus اللول وماحبسش كي سقسيتها وعلاش ماحبسش؟؟ لقيتها كلي بدات
تحكمها الحشمة وقالتلي ماتخافيش ضروك يجي وحد آخر وبالفعل بعد خمس دقايق جا
الثاني والحمد لله حبسلنا وكي رحنا باش نركبوا السائق حبسنا وقالنا لازم
تمدو les cartesَََ!!! انا
[/size]
. رجعت للوراء شوية وقلت لنجاة مانروحش ماعنديش كارطة[/size]
.
خاطر ماكنتش رافدة معايا كارطة تاع النقل الجامعي وهي مسكينة حست بالذنب
وقالتلي انا تان مانروحش مانقدرش نخليك وحدك هذاك الوقت بديت نخمم بلي رجعت
فأل شؤم عليها خاطر هي موالفة دايما تركب وبلا اي مشاكل ماعلاباليش اليوم
علاه كلش تعفس في وجهنا.
[/size]

.
السائق كي شافنا في هذاك الموقف غضناه وقاللنا يالله اركبو هذي المره
نسامحكم بصح اللي كامل ماتوقعتهاش انو النقل الجامعي بعد ماقطع بينا نصف
الطريق يحبس خاطر الموتور خسر يالطيف زهري دخل حتى للموتور تاع النقل
وحبسو.
[/size]

. واظطرينا نكملو مسافة طويييلة مشيا على الاقدام و bien sur نجاة كانت تقول في قلبها يادرى على من صبحت اليوم؟؟؟[/size]

.
اليوم اللي بعدو عاودت تان تلاقيت بيها وكي جيت نازلة معاها كيما البارح
حلفتلي والله ماننزل قالتلي نخلص عليك ركبة حتى للجامعة وخلي الناس مساكين
يروحوا في النقل الجامعي كيما موالفين وطبعا من هذاك اليوم ماعاودتش جربت
زهري وركبت في النقل الجامعي .
[/size]

. وصلى اللهم وسلم على سيدنا محمد[/size]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
همسة براءة



نوع المتصفح موزيلا

صلي على النبي

صل الله عليه وسلم


انجازاتي
لايتوفر على اوسمة بعد:

الوسام الأول


مُساهمةموضوع: رد: حكاية يوميات طالبة جامعية....منقول.....   2011-09-17, 21:48

.السلام عليكم

في هذي الأيام حسيت بلي القرايا بدات تصعاب تع الصح وكامل لبنات بداو يشكو
منها ويقولو بلي صعيبة علينا ماعدا أنا بالطبع لي ماجاتنيش كااااامل صعيبة
كانت بالنسبة ليا مستحيلة تماما وعلى هذاك قررت بلي ما نراطي حتى coure
من الصباح للعشية و اليوم بالذات كان عندنا الprogramme حتى لل 4.30
وفتيحة ولطيفة ماحبوش يبقاو معايا قالك عيينا ولازم نروحو للدار وانا شكيت
كي مافطرتهمش اليوم ماشي خاطر عياو

قعدت وحدي حتى كملت كامل المحاضرات تع اليوم وكي خرجنا مالقتيش الtransport استنيت ساعة باش ركبت والشتا تطيح عليا وكنت نقول في قلبي معليش في سبيل العلم
كي وصلت للمنطقة لي نسكن فيها كان المغرب أذن وراكم عارفين يامات الشتا
بلخف تبدا تظلام الدنيا, من l'arèt للدار لقيت الطريق فاااااارغة حتى واحد
ماكان يدور قلت الحمد لله هكة مايشوفوني غاشي مايقعدو يدو ويجيبو ويقلك
كيفاش هذا وين راهي راجعة ووين كانت هذي راني نعرف عقليات غاشي تاعنا دايما
عندهم تفسير خاص ببنات الجامعة مستحيل يبدلوه مهما كانت البنت.

وبعد ماتنفست وقلت ريحت لقيتلك قدام الباب جمع غفييييييييير من كل أهل
القرية قلت انا اكيد كاينة جفنة ولا عرس و ماسمعتش بيه بديت نسب في زهري
زعما انا لي كنت نقول وين راحو الناس كامل اختفاو من الشوارع وهوما تلايمو
بالظبط قدام باب دارنا وراهم يستناو فيا بديت نخمم وقيلة بابا دار شكوى
بلي خطفوني وانا لاخبر وكي لحقت لقيت بلي قناة صرف المياه لي قدام الباب
خسرت وتلايمو كل رجال الحارة باش يصنعوها وبابا كان معاهم أكيد وكي شافني
خزرني خزرة نعرفها مليح مليح حتى ماما لقيتها مقلقة بزااف عليا وحتى كي
شافتني باش ريحت بصح ماريحتنيش قالتلي وين كنتي حتى لضروك باباك من الصباح
وهو مقلق عليك ومن وقتها وانا نخمم واش نقلو وكيفاش نفهمو وغير دخل بدا يزقي عليا كيفاش؟ووعلاش؟....
مانيش عارفة كيفاش جات في بالي باش نقلو لوكان راك شاريلي بورتابل كنت
عيطتلكم وماخليتكمش تقلقتوا وهذي الكلمة لي sovatni لقى بلي كان عندي الحق
وبدا يفكر جديا باش يشريلي portabl.
ونهار الجمعة جابلي واحد ماشي من الغاليين بصح انا عجبني بزاااااااااف وفرحت
بيه وقعدت كامل اليوم وانا نبيبي للغاشي لي نعرف ارقامهم خوالي وعمامي
وصحاباتي فتيحة ولطيفة أما فاطيمة كانت مازال ماشراتش وماعلاباليش وعلاه
كامل لي بيبتلهم أكثر من خمس مرات كنت كي نجي نزيد نبيبي نلقى الكاسات ترد
عليا (إن جهاز مراسلكم مغلق أو خارج مجال التغطية...) إلا لطيفة مسكينة
الوحيدة لي بقيت نبيبيلها وتردلي حتى لليل حبيت نبيبيلها آخر مرة ردت عليا
الكاسات ( إن جهاز مراسلكم معطل مؤقتا) قلت انا تع الréseau راحو يرقدو

قبل مانرقد قلت nrigule réveil باش نوض بكري وحطيتو تحت المخدة تاعي وغير
دخل خويا لقا الضو تاعو شاعل عندبالو كنت نهدر فيه بدا يسقسي فيا مع من كنت
نهدر قلتلو بلي حتى واحد كنت برك nrigule بصح ماصدقنيش ودارلي حالة وحب
ينحيهلي ولوكان ماشي ابي مسكين تدخل في الوقت المناسب وقالو ماكان مارحلك
انا نوثق في بنتي وراني عارفها كيفاش تمشي ربيتها صح ورح تتصرف صح ونهار
تغلط انا برك لي نهدر معاها.
الحمد لله لي عندي أب حنون ومتفهم .

وصلى اللهم وسلم على سيدنا محمد
[/size]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
همسة براءة



نوع المتصفح موزيلا

صلي على النبي

صل الله عليه وسلم


انجازاتي
لايتوفر على اوسمة بعد:

الوسام الأول


مُساهمةموضوع: رد: حكاية يوميات طالبة جامعية....منقول.....   2011-09-17, 21:50


السلام عليكم


بعد ماقرينا تقريبا شهر أو أكثر قسموناdes groupes ومن زهري طحت انا
وفاطيمة في نفس الفوج اما فتيحة ولطيفة كل وحدة طاحت في فوج وحدها وبدينا
les TD et les TP كان عندنا TD 2 واحد الصباح على 8.00 تع الفيزياء وواحد
العشية على 3.00 تع الرياضيات وكان يخلاص على 4.30 بصح انا وفاطيمة ماكناش
نقدرو نكملو حتى لل 4.30 كنا نعياو الله غالب على هذاك قلنا للبروف احنا
نسكنو بعاد ومايقدناش الوقت كي نخرجو على ال4.30 ايلا تقدر تخلينا نخرجو
على 4.00 والبروف كان عااااااااااقل بزااااااف قالنا ايه معليش كيما تبغو
ومن هذاك اليوم واحنا بلا مايقلنا كي تلحق الربعة نرفدو قشنا ونخرجوا.



اما les TP كانو دايما مع الصباح من 11.00 لل 12.30 في الأول عجبني الحال
كي لبست الطابلية البيضة ودخلت للمخبر حسيت روحي طبيبة بصح كي بدينا
نقراوهم ماعجبنيش كامل الحال وخصوصا كنا نقراو غير على النباتات ولا
الحشرات ونرسموهم في آخر الحصة ومرة برك لي قرينا على جسم الإنسان بصح كان
درس يحشم أما لي بروف لي يقروهملنا صعااااب والغلطة تخلصها غالية معاهم
بغينا مرة نسيو مع البروف تع الفيجيتال الخطة تع الخرجة على 12 اخرجنا بلا
مانقولولها قلنا رانا قاويين ومش رح تفيقلنا ماكناش عارفين بلي أخر الحصة
نمدو كامل رسم تخطيطي للنبتة لي قرينا عليها وهي كامل ماعياتش راسها مدتلنا
0 وخلاص .




باقي أسبوعين للإختبارات وانا كنت ضاااااايعة مع الدروس قررت أني نبدا
نراجع ونلخص كامل الدروس وكل ليلة إمتحان نراجع ملخص المادة لي عندي غدوة
من ذاك و ليلة الإمتحان الأول قررت ندير nuit blanche وقلت نشرب كاس قهوة
قاطعة وماشي مسكرة باش مانرقدتش بصح
غير شديت le cahier حكمني نعاس غريييييييب وماقدرتش نقاوم رقدت وقلت
الصباح nrigul portabl و نوض بكري والصباح غير بدا يصوني البورتابل طفيتو
ورقدت وكي لحقت 7 فطنت وانا مذعورة وقلت تهدرت عليا بقيت نلبس ونقرا ونشرب في قهوتي ونقرا وراكبة في الترنسبور ووافقة وتان نقرا


وكي بدا الامتحان وقسمو علينا les sujet قلت دعاء الإمتحان اللهم لا سهل
إلا ماجعلته سهلا وأنت تجعل الصعب إذا شئت سهلا زعما باش يجيني ساهل وبديت نقرا في الأسئلة كانو 20 سؤال وكل واحد نجاوبو عليه ياإما بـ صح أو خطأ قلت الحمد لله والله أسهل sujet رح ندي 20 من 20 أكيد
وبديت نجاوب السؤال الأول قلت هذا الإجابة تاعو باينة بلي صح ومن بعد قلت
أواه خطأ وبعد رجعت في رايي وقلت ماكانش منها الشيخة تحط السؤال اللأول
وتكون إجابتو خطا نظن بلي صح وحطيتها صح وخلاص
والسؤال الثاني قلت مدام الجواب الأول كان صح نظن الجواب الثاني رح يكون مخالف وحطيت خطأ
وبديت نجاوب على باقي الأسئلة نظن وما نظن ونسيت بأن بعض الظن إثم


وكانت كل أسئلة الإمتحانات الأخرى يا إما تع صح او خطا أو يعطولنا 3
إختيارات وإحنا نخيروا الجواب الصح بيناتهم وفي هذاك النوع من الإمتحانات
كنت نعد للعشرة ولي تطيح فيه عشرة نحطو هو الجواب
ونهار لي أفيشاولنا كنت كارثة بيولوجية عظيييييييمة نادرة وغير متتكررة
الحدوث بشهادة الجميع والمشكل ماكنتش وحدي كانت معايا فتيحة ولطيفة وفاطيمة
الوحيدة لي ماتخيلتش انها تخرج بنقاط احسن منا بزااااااف وهي لي كانت
نادرا ماتحضر الدروس........ يتبع


والحقلة الجاية نقلكم كيفاش جاز العام الأول ويلا طلعت أو لا وخاصة خاصة كيفاش تحصلت فاطيمة على النقاط المليحة
كونوا في الإنتظار


وصلى اللهم وسلم على سيدنا محمد
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
همسة براءة



نوع المتصفح موزيلا

صلي على النبي

صل الله عليه وسلم


انجازاتي
لايتوفر على اوسمة بعد:

الوسام الأول


مُساهمةموضوع: رد: حكاية يوميات طالبة جامعية....منقول.....   2011-09-17, 21:56

.السلام عليكم

قعدت حرقة في قلبي وقلت يبقى اخر يوم من عمري ونعرف لالة فاطيمة كيفاش جابت
غير 10 و11 في كامل المواد ماعدا الرياضيات لي كنا كااااامل تحت العشرة
وماعدا انا كي العادة لي ماكنتش تحت العشرة طبعا إنما كنت تحت الخمسة.

ووحد اليوم قعدت انا وفاطيمة الطابلة التالية في TD تع الرياضيات وتماك
بانتلي باش نسقسيها كيفاش دارت الجنية وهي ماكان عندها حتى مشكل فتحتلي
قلبها وحكاتلي بكل روح رياضية
قالتلي انا كنت شاطرة لخصت كاامل الدروس قلت في قلبي حتى انا كنت نلخص
الدروس بصح لي كانت هي فايتتني بيه هو أنها كانت تلخصهم في وريقات صغار
وكيما قالت هي system تع الحجابات و وراتلي ساعتها العجيبة وخاتمها السحرية
الساعة كانت كبيرة بزااااف تقول تع الحيط وكانت هي تحط تحتها الورقات
الصغار تع الغش وتان في الخاتم لي يتحل ويتبلع كيما الـ cofre
قلتلها ولوكان يفيقو بيك علابالك بلي يمنعوك عامين ماتقرايش حسيتها بلي
ماعمرتش راسها بهدرتي بصح أنا من هذاك الوقت وانا نفكر في هدرتها ومرة نقول
ندير كيما هي ومرة نقول الله يلعنك يابليس
وجاء بسرعة امتحان الفصل الثاني وأنا مازلت ما إتخذتش القرار المناسب ندير
حجابات ولا لالا كنت نراجع ونكتب الملخص في ورقات صغار ونطويهم باش نديرهم
حجابات كيما تع فاطيمة ونهار الإمتحان الصباح وقبل دقيقة مانخرج من الدار
خليتهم وخرجت وتوكلت على ربي.

دخلت للإمتحان وقلت ندير جهدي ولي عليا ولي فاجئني أنو حتى فاطيمة فكرت
مليح في هدرتي وبطلت حكاية الحجابات وفاتت كل الإمتحانات على خير والحمد
لله
ونهار ال affichage كانت نقاطنا في الفصل الثاني أحسن من الأول بصح الكوارث
لي ديناها في الفصل الأول ما قدرتش تمحيها النقاط المتواضعة تع الفصل
الثاني.
ودخلنا للمعركة الثانية وهي synthèse وتماك كانت عندنا فرصة نكونو احنا
الأربعة فاطيمة ولطيفة وفتيحة في نفس القسم لعبلنا الشيطان في راسنا وقلنا
ماراحش نصنعو حجابات أكيد بصح رح نتعانو على الحفظ كل وحدة تحفظ محوروهكة
نكونو احنا الأربعة واحد و نضمنو اننا راجعنا كل المحاور
وكي دخلنا للإمتحان قعدنا أنا وفاطيمة ولطيفة وراء بعض وفتيحة مقابلتنا
وبدينا كل مانلقاو سؤال من محور نخزرو كامل في لي حفظاتو ونقولولها هاتي
الجواب.

فاطيمة كانت أكثر وحدة شجاعة فينا وماتخافش كامل من البروف تهدر وبصوت
مرتفع عاااادي والبروف يسمع الهدرة بصح يحير من وين راهي تصدر ودايما يحصلو
فيا انا المخلوقة الضعيفة ونقعد ساعة وانا نحلف بلي مانيش نهدر وما يأمنونيش وفي هذا الوقت طبعا فاطيمة وفتيحة يكونو يتبادلو في الورق بما أنو البروف يكون لاهي معايا
وفي مرة من المرات عاود عسنا نفس البروف وغير دخل قالي نوضي وقعدي في طابلة
اللولة حسيت روحي ضعت خلاص ومن بعد سلمت أمري لله وقلت كيما جات تجي
خصوصا بعد ماقعد البروف كامل الوقت وهو يحكي على الغش والغشاشين وقال أنو
أكثر حاجة يكرها في حياتو هي الغش.
بصح فاطيمة عمرها ماتتخلى على حلفائها كتبتلي أكثر الإجابات في ممحاة وقالت
للبروف اديهالها هذي ممحاتها خلاتها عندي البروف مسكين حنين جابهالي حتى
لعندي انا ماعرفتش وعلاه بعثولي ممحاة بلا مانطلب وغير خزرت في فاطيمة
زعما باش نفهم غمزتلي عرفت بلي الممحاة كانت فيها اجابات قلتلو صحيت أستاذ
وأنا نقول في قلبي هذا وأنت من الصباح وانت تقلنا انا ضد الغش عشيت انت
بروحك تجيبلي في الإجابات وبلا ماتحس والله فاطيمة هذي خرجت حاجة من
الكبار.

كنا نتوقعو أننا رح نخرجو العام ونتهناو بعد ما درنا كامل هذيك المغامرات
بصح النتائج كانت مخالفة لكل توقعاتنا وخاصة بعد ما الأساتذة الكرام كانوا
مايصحوش الإمتحان ويحطو نقطة الإمتحان الثاني وخلاص والحمد لله كان بقيلنا
آخر فرصة ratrapage بصح أنا كان معدلي قريب من عشرة والمشكل كل المواد
غلقتها بعشرة يعني مانقدرش ندخل فيها الإمتحان الإستداركي إلا المادة لي
كااااااااامل مانبغيهاش وهي الرياضيات والبنات كامل طلعوها يعني فوت
كاااامل الصيف وانا نراجع ودخلت لهذاك الامتحان وانا شادة برك في ربي
والحمد لله ربي كان معايا وخرجت الموديل والعام ونجحت في أول وأصعب عام
جامعي
واصحبت سنة ثانية بيولوجي....

وصلى اللهم وسلم على سيدنا محمد
[/size]


.
هذي الحلقة سر بين البنات

ممنوعة على الشباب

مانحبش نوصيكم بنات

هذا سر

هههههههه

[/size].السلام عليكم
أصبحت في السنة الثانية جامعي هذا الإنتقال كان بعد تعب وجهد كبير حسيت
روحي كامل ماريحتش من الباك للجامعة وحتى الصيف فوتو نقرا في matheكي كانو
يقولولي بلي المكان لي يعلقونا فيه نقاطنا يسموه حائط المبكى كنت نضحك
عليهم بصح بعد المعاناة لي عشتها مع النقاط الهابطة صدقت بلي صح يسموه حائط
المبكى.
في بداية السنة الثانية قررت انا وفاطيمة ندو عطلة نرتاحو فيها من تعب السنة الأولى ياختي من حقنا احنا تعبنا تعب مضاعف وبعد شهر تع راحة لقينا القرايا بدات بصح مزال les TP وles TD على هذاك ماهمناش الأمر
أنا بديت نغير تفكيري بعد لي شفتو من فاطيمة وبزااااف ناس كانو كيما هي
يعني مايحضروش الدروس بصح يدو علامات مليحة قلت انا هذي ممكن هي الطريقة
الصحيحة للدراسة في الجامعة
وبديت مانروحش بكري للجامعة ومرات كي نكره من القرايا نخرج ونقعد ندور مع فاطيمة ولاكليك تعها
وهي تان قامت بيا تع الصح عرفتني كاااااااامل عليهم وكانو بطبيعة الحال
مختلطين بنات وولاد وانا اكيد ماكانش عندي مانع حسيت روحي كبيرة وعادي يكون
عندي أصدقاء من الجنسين.
في أول لقاء هدروا في بزاف مواضيع كانت هادفة ومفيدة حكاو على كلش على نظام
الحكم في الجزائر وعلى فلسطين وعلى حالة الشباب لي في الخارج كلها مواضيع
كنت نسكت فيها كامل صحاباتي كي ننحط معاهم في نقاش بصح هذاك اليوم حكمتني
الحشمة وسكت كامل لاحظو عليا هذا الشيئ
وفجأة وانا في هذاك الموقف سقساني كريم احد أفراد الشلة
!!!!!! Tu es timide
وانا بطيبعة الحال مافهمتوش كامل واش قصد وحرت اذا نقولو ايه وتكون إجابة
السؤال في الحقيقة لالا أو نقولو لالا وتكون الإجابة الصحية هي ايه وجاوبتو
كي عادتي في مثل هذه المواقف : ممممممم شوية مرات ايه ومرات لالاا
وكي رجعت للدار لقيت خالتي عندنا مسكينة كلما تشوفني تقلي كنتي وانا دايما
نغلطها ونقلها كيفاش وك انتي رضعتيني وتقعد هي تحلفلي بلي عمرها مارضعتني
وانا نقلها اوااااااااااه انتي ماراكيش تحصي انا راني حاصية عليك
وفي الأخير تقلي غير انتي لي مانقدرش عليك .
كي شافت عندي البورتابل دات رقم تاعي وقالتلي باش نولي نعيط لاختي ونسقسي عليها
وبعد يومين كنت في الجامعة قرينا أول كوووغ وخرجنا انا وفاطيمة نشموا شوية
هواء صونا التلفون تاعي ولقيت رقم غريب في الأول ماردتيش ماحبيتش يكون كاش
واحد غالط ومن بعد نحصل معاه
والعشية كي رجعت للدار وصلني مساج من هذاك الرقم وقالي انا سليم وليد خالتك
ارفدي عليا التلفون أما باغية تهدر مع خالتي وغير رفدت عليه قالي واش بيك
يا المخلوعة درتي تلفون وليتي تتكبري على الغاشي وماترفديش
وبعدها جوزتلو ماما
ثاني يوم كي رحت للجامعة وعلى 12.30 بدا يعطلي مرة ثانية قلت انا كاش ما
استحق باينة رفدت عليه وقلتلو واش يالمخلوع انت لي تدي رقمو راك تندمو كل
وقت تعيط
حسيتو كشغل شوية حشم على روحو وبعد قالي والله بغيت برك نسقسك كيفاش راكي
مع القريا وهذا مكان وبعد ماهدرنا شوية قالي معليش نولي مرة على مرة
ونعيطلك انا مافهمتش وعلاش سقساني هذا السؤال الغريب وجاوبتو اكيد هذي
محتاجة سؤال وفي قلبي قلت ياخي مهبول
وبدا مرة على مرة يعطلي حتى لهذاك اليوم بدا يصونيلي البورتابل على 12 تع
الليل انا انخلعت وقلت أكيد خالتي راهي مريضة بزااااف وراه يعيط باش يقلنا
وغير رفدت قلتلو خير ان شاء الله مالها خالتي
قالي ماتتقلقيش خالتك راهي راقدة على روحها مابيها والو
انا برك راني نعيط
وقتها زقيت في وجهو وقلتلو ماتعاودهاش راك خلعتني وزيد انا نرقد بكري هذا ماشي وقت تلفون
حسيتو كشغل زعف بصح tellement كنت نعسانة بزااف ماكانش عندي وقت باش نفكر في واش صرا رقدت تم تم
والصباح كي نضت نسيت كامل الحادثة هذيك.
بعد يومين جات لعندنا خالتي وهذي المرة جات ماشي كي موالف لقيتها قاعدة في
الصالون مع ماما ويهدرو surieux وغير شافوني دخلت عيطولي بدات خالتي تشكر
فيا قلتلها ماتقوليليش راكي معولة عليا كاش مانقضيلك صالحة ماما موالف كي
تبغيني كاش مانديلها تولي تشكر فيا هاكة
ضحكت وقالتلي لالا بصح انا جيت نخطبك لوليدي سليم هو حبك وقالي عليك
وهذاك الوقت تفكرت حكاية التلفون تع نص الليل قلت في قلبي يعني كان لازم يعيط بعد ال12 باش يبينلي بلي ......
انا أكيد كان الزواج أخر شيئ نفكر فيه وزيد سليم دايما نحسو خويا وعمري مافكرت فيه غير هكذا
والحاجة لي عمري مانقدر ننساها انو كي كنا صغار كنت كي نجي انا الثانية وهو
الأول في القسم نحكمو ونشبعو هراوة خاطر ماكنتش نحب لي يجي خيرمني .
قلت مستحيل نتزوج مع انسان عندي معاه ذكريات مثل هذي وخالتي باتت الليل
كامل وهي تحاول معايا خاصة بعد ما ماما وبابا قالولها شوفي هي ايلا قبلت
احنا ماعندنا حتى مانع سليم عاقل ومربي وأكيد قالو هذا الكلام لأنهم
ماسمعوش بحكاية التلفون تع نص الليل وإلا كان عندهم رأي ثاني
بصح انا كان مستحيل نوافق وبعد ما اصرت خالتي عليا وهي تقلي اعطيني سبب واحد وعلاه ماكيش قابلة
قلتلها خاطر هو يحب غنا تع الشاب حسني ونصروو وانا نحب نسمع غير الشرقي
أكيد ماكانش هذا السبب بصح كان لازم نلقهالها عفسة باش نسكتها.
قالتلي تع الصح غير انتي لي مانقدرش عليك.
خالتي مسكينة فشلت معايا وعرفت وتأكدت بلي مستحيل نوافق على واش راهي تطلب وقالتلي بلي ماتزيدتش تجي عندنا وزعفت بزاااااااااف علينا
بصح ماما مابغاتش تخسرها وبقات هي دايما تروح ليها وبعد شهرين كاملين رضات
علينا ورجعت الأمور عادي خلاص ورجعت انا نروح لعندهم كيما موالف و جامي
ويلا يلقاني سليم
بصح حاجة وحدة مافهمتاش وعلاه كل مانروح نلقاه غالق على روحو في شمبرتو وويسمع في الغنية تع
نسياااااااااانك صعب أكيد؟؟؟؟ . زعما دورها شرقي...........
وصلى اللهم وسلم على سيدنا محمد
[/size]

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
همسة براءة



نوع المتصفح موزيلا

صلي على النبي

صل الله عليه وسلم


انجازاتي
لايتوفر على اوسمة بعد:

الوسام الأول


مُساهمةموضوع: رد: حكاية يوميات طالبة جامعية....منقول.....   2011-09-17, 21:59

.السلام عليكم




خالتي مسكينة مع انها سامحتني بصح مانساتش الحرقة لي خليتها في قلبها وبدات
تحوس على بنت حلال باش تخطبها لوليدها وبما انو كاين بنات حلال بزااااف في
الجزائر لقاتلو وحدة تناسبو تماما كيما قالت هي وخطبتها وعرضتنا للفاتحة
انا نظن دارت كامل هذا الشي غير باش تجي هذيك اللحظة لي ترفد فيها التلفون
وتقلي: آآآآآآآآآلـــــــــــو أسمعي راكي معروضة للفيوناسي تع سليم
وبالاكي ماتجيش


بصح انا والله فرحتلو من قلبي وتمنيت ربي يهنيه وقلتلها اكيد نجي سليم خويا وانتي في بلاصة ماما لازم نجو ونفرحو معاكم
وبعد ماخلصت التلفون معاها بديت نخمم..........




ماشي في سليم طبعا كنت نخمم في واش رح نلبس في الحفلة بابا راه بالسيف
يعطيلي باش نركب وناكل ونخرج البحوث مانقدرش نقلو أعطيلي تان باش نعرس و
حتى la borse
تع العام لي فات كامل مزال ماتدخلني و كل مانروح نشتكي يقولولي الملف ناقص
وكلما نقلهم واش يتقصو يجبدولي ورقة مانعرف مين ويقولولي راهي ناقصة نروح
على سعدي نخرجها ونزيدها للدوسي حتى للمرة التالية قررت باش نروح وايلا
قالولي راه ناقص تان نديرلهم سعدهم في يدهم ونقلهم بقاتلي غير لابوغس
نستفيد منها من الجامعة حرمتوني منها





بصح الحمد لله كان عندي الزهر ولا كان عندهم هوما الزهر مانعرف المهم كي
لحقت وسقسيهم قالولي خلاص رح يوصلوك les borses كامل مرة وحدة وخرجت من تم
وانا نوجد في ليستة كبيرة تع كامل واش كان يخصني

- مونتو تع كشمير كحل
- cavalière
- ســـــــــــــــــــــــا ك
- ولبسة شابة لفاتحة سليم
- 500 دج تع فليكسي
- وحجاب لماما


وخرجت نشري انا و صحبتي فاطيمة هي تان كانت حابة تشري بزاف صوالح
وغير لحقنا للسوق وساومت وشفت بعيني الأسعار بديت نمحي بالحاجة من الليستة
لي وجتها حسيت روحي وجدت هذيك الليستة في عهد الستينات كي كان الخبز يدير 4
دورو خاطر صبت فرق كبير بين الميزانية لي درتها وبين الأسعار لي راهي تمشي



وبالطبع رجعت للدار والشيئ الوحيد لي قدرت نشريه هو الحجاب تع ماما حشمت ايلا نرجع بلا بيه وكنت وعدتها نشريلها واحد
ومن محاسن الصدف لقيت جداتي عندنا قالك جات تضيف قلت في قلبي وقيلة حست بلي
رفدت دراهمي من لابوست ومن بعد قلت الله يلعنك يابليس هذي جداتي عمرها
ماتخمم هكة


ماما فرحت بزااااف بالحجاب وقعدت غير تدعيلي وناضت لبست الحجاب اكيد جاها شباب شرية يدي


بصح جداتي العزيزة غير شافت ماما بالحجاب بعد ماسمعتني شوية الدعوات المعتادة
بدات تقول حتى انا خصني حايك مرمة باش نخرج لعراس
قلتلها ياجدة وين رانا ووين راه الحايك مرمة عندي بزاااف ماسمعتش بهذي الكلمة


وعلى هذي الكلمة ناضت جداتي دارتلي درس كبير في الحوايج تع بكري والعهد
تاعهم وكيفاش كانو يعرفو يلبسو وكيفاش كان ولد الولد يخمم في جداه قبل
يماه؟؟؟؟


اكيد بقيت وسمعت المحاضرة حتى للأخير وكي خلصت هدرتها نضت بلخف خفت يكون مجرد فاصل وستواصل


وبعد ما دخلت لشمبرتي لقيت اختي حتى هي زعفانة مني وقالك ياسيدي وعلاه نسيتيني لوكان جبتيلي غير حبة حلوة من دراهمك كنت قلت تبغيني
زعما كلي صح لوكان جبتلها حبة حلوة تكفيها؟؟؟



وفي الليل بت نخمم في العايلة الكريمة تاعي لي حسبوني بديت نخدم خلاص وبدا
كل واحد يقلي واش تشريلي وهذا الوقت تفكرت طبعا سلسلة الشكاوي لي درتها باش
خلصت هذي
la borse لوكان عرفت بلي رح يصرالي هكة أكيد كنت ..........



درت الشكاوي تان خاطر مانحب حتى واحد يديلي حقي نديه انا وماعليش نقسمو على الناس المهم ندي حقي


في الصباح قررت باش نشري لكل واحد في العايلة حاجة ولو رمزية وحتى جداتي
شريتلها حجاب باش حتى واحد مايزعف عليا أما انا محييييت كااااااامل الليستة
ماعدا الفليكسي طبعا لا أستغني عنه ولبسة للفاتحة تع سليم


وهكذا كسبت رضى الرأي العام وحضرت حفلة سليم الحفلة كانت هايلة وخطيبتو مليحة يعني


و كيما قالت جداتي الحنونة ماشي شابة عليك يابنتي والله انتي زينة عليها
مانعرف ويلا قالتلي هكة خاطر صح انا شابة عليها ولا غير كي شريتلها الحجاب .


وصلى اللهم على سيدنا محمد
[/size]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
حكاية يوميات طالبة جامعية....منقول.....
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
شبكة سيدي عامر :: المنتديات العامه :: المنتدى العام-
انتقل الى: